Warga nagari Batangihan Tasadak! Tabilalak! Tibo-tibo padi di sawah Mak Palik nan tigo piriang gadang rabah, colak-colak indak bakantantuan bantuak rambuik salah cukua. Saparo botak, saparo dipadiakan tagak.
Tapi, jajak di sawah tu aneh pulo. Jiko dipanjek batang karambia nan adoh dakek sawah tu, dicaliak mato ka bawah, jajak di sawah tu bantuak ado gambar. Ado nan mangatokan bantuak gambar koncek dalam timpuruang, sahinggo bulek tampuruang jo nan nampak nyo. Ado pulo nan mangecekan gambar tu gambar mancik manunggiang, sahinggo nan tampak bulek lubang ikua nyo sajo. Tiok dicaliak, tiok babeda pancaliakan urang. Wayooooiiik! Rumik!
Sadang pun baitu, saparti nan taralah, tiok adoh nan ganjia, banyak urang nan nio tahu, nio mancaliak. Mako, baduyun-duyun pulo urang datang ka nagari Batangihan, ka sawah Mak Palik. Mode galo-galo urang datang ka tampek tu.
Urang nan sambuah ka sawah Mak Palik, tanyato indak urang dari dalam negeri sajo. Antah dari mano dapek kaba, lah tibo pulo sarombongan oto bus urang barat alias bule. Katonyo, urang barat tu nak nio maniliti gambar di sawah tu. Pangana urang barat tu, mano tahu gambar di sawah tu adolah krop sirkel, jajak pendaratan UFO, pesawat nan ditumpangi Alien.
“Krop sirkel? UFO? Alien?” Buyuang Karapai bakaruik kaniang mandanganyo.
Samantang pun bak itu, Buyuang Karapai sebagai rang mudo nagari Batangihan nan capek kaki ringan tangan, lakeh ambiak kesempatan. Untuak wisatawan nan ingin mancaliak gambar dari batang karambia, Buyuang Karapai manyadiokan janjang buluah panjang 13 meter.
“Hawaiyoik, Sir? Yu, wan lihat gambar on pohon kerambil,” tawar Karapai ka urang barat.
“Free?” baleh si urang barat
“Free? Perai? No, no, no. Tantulah indak. Manalah ada yang gratis sekarang, Sir. Memacit godok pisang saja kena Sir wanhandred sekarang,” balas Karapai
Sibule barambuik jaguang mangaluakan pitih Lima puluh ribu. Karapai tabilalak.
“Oke, oke. Orraait Sir, yes, wait. Aiyem ambilkan jenjang,” mancaliak pitih nan bawarna ijau langik, langsung ijau langik pulo mato karapai bantuak mamakai kontak lens. Samantaro si bule rambuik jaguang langsung mahimbau dunsanaknyo sasamo urang barat dari ateh bus pariwisata.
Buyuang Karapai, tahanyak mancaliak urang barat barambuik jaguang turun bakarumun dari pintu oto bus. Tadi, inyo sangko pitih limo pulub ribu untuak surang Sir nanti tadi se. Karapai sangko inyo lah cadiak, takicuah si Sir katonyo. Kironyo urang barat barambuik jagung tu labiah salasai paretongannyo. Pitih Limo puluh ribu untuak saratuih urang ka naik janjang mamanjek batang karambia.
“Yo lah asli jaguang Sir, ko mah. Kanai wadeen!” sasa Karapai manggarutuak tak badayo.
Sahari panuah rombongan urang barat barambuik jaguang di sawah tu. Nan nyo karajoan disitu mamoto jajak padi nan tasabik dari sagalo arah. Sagalo jajak inyo rekam, nyo ukua jo ukuran melimeter.
“Sakik preman ko mah,” pangana Karapai mancaliak bule-bule tu.
“Yes, I sure, its Crop Circle. Ini adalah jejak UFO. Aliens, makhluk luar angkasa telah datang,” tabata-bata,tabang-tabang ayia ludah si Sir nan partamo tadi manjalehan ka Karapai. Karapai taparangah. Inyo lai mangarati saketek jo bahaso Inggeris.
“Wait, wait Sir. Tunggu seminit. Saya panggilkan Prof. Jimbrehe.”
Mandanga panjalehan itu, Karapai basigageh maninggakan rombongan urang barat. Karapai paralu malaporkan peristiwa ko Prof. Jimbrehe.
Langkah suok bana dek Karapai. Prof. Jimbrehe baru katurun dari rumah gadangnyo. Niek hati nio ka lapau Cik Etek.
“Prof, prof, wait, wait.” kato si Karapai mahambek langkah Prof Jimbrehe.
“Karapai, dek apo angku. Bantuak dikaja ciliang, bahaso inggeris lo tu, dima pulo tacaliak kamus Jon Ekols ?” Prof Jimbrehe heran.
“Prof, ado Alien datang dengan UFO meninggalkan krop sirkel di sawah Mak palik.” Lapor Karapai bantuak prajurit malapor ka jendral. Prof taparangah. Dicaliak mato karapai nan masih ijau langik.
“Lai indak sadang mabuak angku, Pai?”
“Indak Prof, itu kecek urang barat nan tibo ka sawah. Denai harok Prof. ka sawah kini manamui urang barat tu.”
Mako maluncualah Prof Jimbrehe jo Buyuang Karapai ka sawah tu. Tibo di sawah urang barat tu lah tabik paluah dek mamoto jo maukua. Prof Jimbrehe langsung merapek ka pamatang sawah. Karapai memperkenalkan Prof Jimbrehe ka urang barat.
“Siang Tuan, sepertinya tempat ini telah didatangi Aliens. Mereka datang dengan UFO. Buktinya ada Crop Circle di sawah ini.” Tarang si Barat.
Prof tahanok. Indak basuaro. Nyo caliak sakalilian pamatang.
“Karapai, caliak pamatang tu. Lai ado nampak dek angku ado apo di situ?” suruah Prof Jimbrehe. Karapai bersigegas mamareso pamatang nan lah tinggi rumpuiknyo
“Ado Lubang Prof,” jawek karapai
“Yo, tu lubang aliens nan mambueh krop sirkel mah. Karuak jo tangan angku, Pai.”
Mako dikaruaknyo samo tangan dek Karapai
“Eeee Manciiiiikkkkk!!!!!!!!”
Karapai lari jijai mangakok mancik. Prof jimbrehe takaka manahan galak. Urang barat binguang.(il)
30/1/11
Tidak ada komentar:
Posting Komentar